CAGAYAN DE ORO CITY – Naugdaw ang anaa sa 21 ka balay nunot sa natigayong sunog sa boarding house nga gipanag-iya ni Magno Monares Jr sa Purok 3,Sitio Ramonal Village,Brgy Camaman-an ning syudad kaganihang buntag.
Gibutyag ni Nazareth Fire Station commander Fire Senior Insp Willy Tan nga paspas ang pagkaylap sa kalayo gumikan kay mugna sa materyales nga dali masunog.
Sa pagkakaron,dili pa mabutyag sa mga otoridad ang hinungdan sa pag-ulbo sa kalayo.
Una nang mitala sa 700-mil pesos ang inisyal nga stractural damage sa hitabo ug hinoon,walay kinabuhi sa tawo nga nakalas.
Samtang giangkon ni Monares nga mismo sa iyang pinuy-anan naggikan ang pag-ulbo sa kalayo ayha nadamay ang laing kabalayan sa Purok 3,Sitio Ramonal Village,Brgy Camaman-an ning syudad.
Miingon si Monares nga nagsumikad ang kalayo sa ikaduhang andana diin nahimutang ang usa sa mga kuwarto nga giabangan sa iyang boarder nga babaye.
Siya miingon nga gisulayan pa niya’g saka aron palungon ang nagdilaab nga kalayo apan wala na niini makaya ang gumikan sa kainit ug peligro.
Hinoon,luwas ra sila nga nagtagbalay kay pulos sila nakagawas gikan sa maong sunog.
Dugtong niini,gilayong naka-posisyon ang konseho sa brgy aron tabangan ug temporaryong mapahimutang ang mga pamilya sa brgy covered court nga biktima sa dakong sunog sa pikas sitio Camaman-an ning syudad.
Gibutyag ni Camaman-an Punong Brgy Pedro Arda nga samtang pangitaan pa sa paagi makabangon ang mga biktima sa sunog,gipahimutang una sila sa centro covered court aron matutukan ang mga kahimtang ilabina ang ilang mga panglawas gikan sa trahedya.
Namahayag si Arda nga maoy labing dinalian nila nga kinahanglan ang mga bugas ug pagkaong de lata aron magamit gilayon sa mga bakwit nga pamilya.
Giawhag usab ang mga tigpaminaw sa Bombo Radyo nga kon may sobra sobra sa inyong grasya,mahimong e-diritso na ninyo paghatod sa brgy hall sa Camaman-aron mabahin-bahin alang sa mga biktima sa trahedya.
