Mi-angkon ang Commission on Elections (COMELEC) nga lisod na makab-ot ang target nga 65% voter’s turnout sa special elections sa ika-duhang distrito sa Antipolo City.
Sumala ni COMELEC Chairman Atty. George Sherwin Garcia, bisan pa kung ipa-ubos sa 35% ang turnout, lisod gihapon kini makab-ot tungod kay sa kasamtangan 66,994 pa lang ang naka-botar gikan sa 262,293-ka rehistradong botante hangtod alas‑5 sa hapon.
Gipasalig ni Garcia nga wala kini nagpasabot nga adunay problema sa botohan o failure of elections bisan pa nga mano‑mano ang pagboto.
Matod ni Garcia nga posibleng nakaapekto sa turnout ang kamatuoran nga usa ra ka posisyon ang gibotohan ug uban pang personal nga rason sa mga botante.
Mahinumduman nga ang bakante nga posisyon mitungha human sa pagkamatay ni Romeo Acop, ang incumbent, niadtong Disyembre 20, 2025. (co-written Phillip Ariata)
