Masubo nga gipadayag sa Alliance of Concerned Teachers (ACT) Philippines nga dako nga bahin sa mga magtutudlo sa nasud ang nalubog karon sa utang tungod sa kakulang sa kita.
Sumala ni Ruby Bernardo sa ACT Philippines, base sa ilang pagtuon niadtong 2018, mokabat sa 75 porsyento sa mga magtutudlo ang adunay mga utang aron masuportahan ang adlaw-adlaw nga panginahanglan.
Iyang gitin-aw nga usa sa nag-unang hinungdan sa pangutang mao ang pagpaeskwela sa ilang mga anak, ilabi na sa tuition ug uban pang gastuhon sa pagtuon.
Sunod niini mao ang panginahanglan sa pag-atiman sa masakitong miyembro sa pamilya diin mapugos usab mangutang ang mga magtutudlo.
Dugang pa niya, gikatingala usab sa ilang pagtuon nga daghang teachers ang nangutang aron makapalit og gamit sa eskwelahan sama sa laptop, projector ug telebisyon nga ilang magamit sa pagtudlo.
Tungod niini, nanawagan ang ACT nga pausbawon ang suhol sa mga magtutudlo ug mapugngan ang pag-abuso sa mga nagpautang nga nagapataw og taas kaayong interes.
