CAGAYAN DE ORO CITY – Gikakurat sa kanhi bise-gobernador sa Misamis Oriental nga si Joey Pelaez nga naka-kontrata na sa Public Private Partnership o PPP ang walo ka provincial district hospitals nga ubos sa pagdumala sa provincial govt sa lalawigan.
Kini human nakakuha’g kopya ang Bombo Radyo kabahin sa gisudlang PPP sa probinsya ngadto sa pribadong health services provider nga nakakuha sa 25 ka tuig nga kontrata niini.
Gibutyag ni Pelaez nga dili kalikayan nga makapangutana ang katawhan kon asa na ang dagkong pondo alang sa programang panglawas sa probinsya sa kada-tuig nga gipangayo sa kapitolyo.
Siya miingon nga wala gani masayod ang katawhan nga misulod na usab sa laing kasabutan ang kagamhanan ngadto sa pribadong investor.
Samtang namahayag usab si Roy Waga kinsa consultant sa Misamis Oriental Provincial Information Office nga gitugot man sa balaod ang pagsulod sa matag-gobierno sa PPP.
Kini tungod kay daghan na nga local govt units ang mihimo niini ug dili lang ang lalawigan.
Siya miingon nga tinud-anay nga nagpakabana ang kanhi bise-gobernadorr, nganong hilom siya sa gisudlan usab nga kontrata sa DOTR nga PPP aron dumalahon nga pribado sa 35 ka tuig ang Laguindingan Airport .
