CAGAYAN DE ORO CITY-Ekslusibo nga gikanta sa Bombo Radyo sa singing soldier nga si Sgt Ronnie Halasan gikan sa 1st ID Tabak,Philippine Army ang bag-ong komposisyon niya nga kanta.
Si Halasan mao ang sundalo nga nag-trending sa social media tungod sa iyang kanta nga “Bangon Marawi”.
Gibutyag ni Halasan nga inspirasyon niya sa iyang bag-ong kanta nga giuloha’g “Damdamin sa Marawi” mao ang nakita niyang bata nga naghilak ug nagkurog sa kahadlok tungod sa nasinatiang kagubot sa ilang lugar samtang gihawiran sa iyang inahan.
Gibutyag usab ni Halasan nga tumong sa iyang kanta nga “Bangon Marawi” nga mapaabot ang mensahe nga gikinahanglang magkahiusa ang mga Kristiyano ug Muslim nga apektado sa kagubot sa Marawi City.
Siya miingon nga dili masulbad ang kagubot tali na sa Maute-ISIS group ug tropa sa gobyerno pinaagi sa bayolenteng paagi.
Hisayran nga gikan pa sa Marawi City si Halasan ug midalikyat kini sa istasyon aron ipabati sa tanan ang composition niyang kanta nga ‘Bangon Marawi’.
