CAGAYAN DE ORO CITY-Makalaum ang kontrobersyal nga si Comelec Chairman Andres Bautista sa patas nga paghimo sa imbestigasyon nunot sa impeachment complaint nga gitakdang dunggon sa justice committee sa House of Representatives sa sunod semana.
Paniguro kini ni House Justice Committee Chairman at Oriental Mindoro Rep Rey Umali nunot sa himoon nila pagsuta sa reklamo ni kanhi Negros Oriental Rep Jacinto Paras batok kang Bautista.
Gibutyag sa Bombo Radyo ni Umali nga susama sa ilang gihimo sa pagdungog sa impeachment complaint batok kang Pangulong Rodrigo Duterte ning tuiga,gamiton usab nila ang maong sistema alang kang Bautista.
Gibutyag ni Umali nga gilikayan usab nila nga mahimong bias ang komitiba nga iyang gipanguluhan ilabina nga mosud-ong ang publiko niini.
Una nang nagduso’g reklamo si Paras dihang gibulgar sa kampo ni Patricia Paz Bautista nga nagbaton sa tinago nga bahandi ang chairman sa Comelec.
Hisayrang tulo sa mga kongresista usab ang nag-indorso sa reklamo ni Paras hinungdan nga miabot sa komitiba ni Umali.
