CAGAYAN DE ORO CITY-Nabalhog na sa city jail ang tulo ka akusado nga naglakip sa Australian national ug duha ka Pinay diha sa Brgy Lumbia ning syudad.
Kini human nag-atubang sa upat ka kasong kriminal si Australian national Cane Andrews,56 anyos ug ang iyang duha ka asawa nga si Jezelle Acdel-Andrews nga taga- Agusan del Norte ug Angeli Palaran nga taga-Bayawan City,Negros Oriental.
Gibutyag ni C/Insp Pedro Gorre Jr,hepe sa PNP-Maritime Cagayan de Oro nga unang midangop si Palaran sa ilang opisina tungod sa pagdagmal ni Andrews kaniya.
Apan nadiskobre nga naghupot kini’g babayeng menor de edad aron unta kuyugon pag-uli sa ilang lugar hinungdan nadiskobre sa PNP nga kabahin siya sa ilegal nga kalihukan ni Andrews.
Gilayong mihimo’g rescue operation ang PNP ug DSWD-10 hinungdan naluwas ang duha ka menor de edad nga gipatoo sa mga suspek nga ilang sinagop.
Nasikop ang langyaw ug si Acdel sa ilang giabangang subdivision sa Westwood sa Brgy Carmen sa syudad sa miaging adlaw.
