CAGAYAN DE ORO CITY-Gihangyo ni Marawi City Mayor Majul Usman Gandamra ang publiko nga dili na padak-on pa ang kontrobersiyal nga pagka-rescue ni Fr Chito Suganob sa mga kamot sa terorista.
Kini human wala magkapareha ang pahayag sa militar ug ni Fr Suganob may kalabutan sa pagkarescue niini.
Matud ni Gandamra nga maoy angayang hunahunaon sa publiko ang gihimong pagpaningkamot sa militar nga marescue ang hostages sa kamot sa mga Maute ilabina nga daghan ang nangamatay sa ilang panig.
Una nang gibutyag ni Suganob nga nakaikyas siya gikan sa mga kamot sa terorista ug wala direkta maluwas sa militar sulod sa main battle area sa Marawi City.
Samtang masaligon si Gandamra nga hapit na matapos ang kapin tulo ka bulan nga engkuwentro sa panig sa militar ug mga teroristang Maute sa Marawi City.
Si Gandamra miingon nga daghan nang mga senyales nga nagpamatood nga hapit na makontrol sa militar ang tibook
Marawi ilabina nga nailog na niini ang strongholds sa mga Maute ingon man ang pagka-rescue kang Suganob.
Una nang miggawas ang report nga sunod sunod nga nakadawat sa impormasyon ang Joint Task Force Marawi nga adunay mga Maute members ang gusto mo- surrender sa militar. .
