CAGAYAN DE ORO CITY-Kagustuhan sa kahitas-an kon nganong naluwas pa sa militar si Fr Teresito ‘Chito’ Suganob gikan sa mga kamot sa teroristang Maute-ISIS sa Marawi City.
Kini ang pagsugilon ni Fr Suganob ngadto kang ARMM 1st District Assemblyman Zia Alonto Adiong atol sa ilang panagkita gikan pagkaluwas niini.
Gibutyag ni Adiong nga bugtong pangandoy lamang ni Suganob nga dili mapatyan ang iyang mga kaubang bihag ug matibawas na sa labing dalo nga panahon ang kagubot sa Marawi City.
Si Suganob kuyog ang laing dul-ag 10 ka sibilyan ang kabahin sa gidagit sa mga terorista mismo sulod sa compound sa St Mary’s Cathedral diin siya nagsilbi nga vicar general sa maong dakbayan niadtong Mayo 23 ning tuiga.
Dugtong niini,gihangyo sa simbahang Katoliko ang gobierno nga mapadali ang pagbuhi sa kapin 50 ka civilian hostages nga giingong anaa pa sa mga kamot sa teroristang Maute-ISIS sa Marawi City.
Kini samtang gikalipay sa simbahan ang pagkabuhi-i ni Suganob nga gi-hostage sa mga terorista sulod sa kapi’g tulo ka bulan.
Namahayag si Msgr Rey Manuel Monsanto,consultor sa Arkidiyosis sa Cagayan de Oro nga tinguha usab nila nga mabuhian na sa daling panahon ang ubang hostages aron dili gamitong taming sa mga terorista.
Malaumon sila nga makahatag sa ka-ugalingong pahayag ang nakaluwas nila nga kauban human ipaubos sa pyschoco-social processing.
Samtang kumpiyansa na ang gobierno nga dili na magdugay ug mahingpit na ang pagpuhag sa teroristang Maute-ISIS nga nagsabwag kagubot sa Marawi City.
Kini human bugtong si Omar Maute ug Abu Sayyaf Group leader Isnilon Hapilon ang nangulo sa nabiling mga terorista ang nakig-engkuwentro sa militar sulod sa main battle area.
Gibutyag ni Defense Sec Delfin Lorenzana nga kuyog ang armadong kusog sa nasud,hayan matapos na sulod ning bulana ang krisis sa Marawi City.
Sa pagkakaron,mokabat na sa 673 ka terorista ang napatay sa militar samtang 149 usab ang nakalas sa govt forces ug 47 gikan sa mga sibilyan.
