CAGAYAN DE ORO CITY-Tapuson na sa militar ang pagpuhag sa nabiling mga teroristang Maute-ISIS nga pabiling nagtagu-tago sulod sa war zone sa Marawi City.
Kini subay sa gitug-an sa kasundaluhan kang Pres Rodrigo Duterte nga mibisita sa ika-limang higayon sa maong syudad kagahapon sa hapon.
Gibutyag ni Duterte nga mihinay ang military operations tungod kay gilikayan niini nga may mga sundalo pa nga makalas ug mga sibilyan nga gi-hostage sa mga terorista.
Namatay sa kapi’g tulo ka bulan nga engkuwentro ang sobra 800 ka kinabuhi na diin naglakip sa 600 ka terorista,147 ka sundalo ug 47 ka sibilyan.
Alayon niini,gibulgar ni Duterte ang narco-politicians nga supporters sa mga teroristang Maute-ISIS nga nagsabwag kagubot sa Marawi City.
Kini human subli gibisita ni Duterte ang mga sundalo sa 103rd ID,Philippine Army headquarters samtang na-busy ang mga progresibong pundok paglusad sa rally sa ika-45 ka tuig anibersaryo sa martial law sa nasud kagahapong adlawa.
Kabahin sa gibulgar ni Duterte si late Ozamiz City Mayor Reynaldo ‘Aldong’ Parojinog Sr ug ubang mga politiko nga nakabase sa Central Mindanao.
Gibasehan niini ang drug matrix nga nakuha sa militar gikan sa mga terorista nga nakig-engkuwentro sa kapi’g tulo ka bulan na sa Marawi City.
Subli usab gipasabot ni Duterte ang paghatag proteksyon sa minilyong OFWs nga nagtrabaho sa Arab countries bisan gimando ang pagbulbos sa teroristang Maute-ISIS sa Marawi City.
Kini human subli nagmagahi si Duterte nga dagmalan ang mga moske nga gihimong hide-out sa mga terorista aron dili madali-dali’g atake sa militar.
Namahayag si Duterte nga dili niya gusto maipit sa kasuko sa Arab countries ang OFWs kon ugaling maigo sa pagpamomba ang mga dagkong moske sa Marawi City.
