CAGAYAN DE ORO CITY-Wala na magtoo ang usa sa upat ka civilian hostages nga buhi pa kini nga makagawas gikan sa main battle area sa Marawi City.
Kini ang bahagi sa pagsaysay sa Ilongo nga si Lordvin Acopio samtang gilab-as ang iyang kasinatian samtang bihag sa mga teroristang Maute-ISIS sa pagbuto sa init nga engkuwentro tali militar sa maong syudad.
Gibutyag ni Acopio ng a napugos sila mogawas gikan sa ilang pagtago sa Dansalan College o DC tungod kay nagbahad ang mga terorista nga sunugon ang tunghaan.
Gisakay sila sa van diin una nang nakarga sa mga terorista ang grupo ni Fr Chito Suganob nga gidagit gihapon gikan sa St Mary’s School.
Sulti pa ni Acopio nga nagsilbing Grade 7 Math ug History teacher nga gimanduan sila nga makig-koordinar sa mga tag-as nga opisyal sa gobierno aron ipasibog ang mga sundalo nga migukod kanila niatong tungura.
Gitoohan pa niini nga dungan na sila nga i-masaker kuyog ang mga naghilak nga mga babaye tungod kay wala nila nasunod ang gipahimo kanila.
Gikompirmar usab niini nga gisugo sila nga sudlon ang mga balay aron manguha’g armas ug mga bala nga magamit sa pakigsangka sa mga sundalo.
Gitago usab sila sa mga terorista sa taas nga panahon sa Bato Mosque samtang napugos pagbalhin-balhin dihang gipakusog na’g maayo sa militar ang pag-atake.
Hisayrang si Acopio ang nag-inusaran nga Kristiyano sa upat ka hostage nga naka-eskapo ug naluwas sa militar gikan sa war zone sa Marawi City ning semanaha.
