CAGAYAN DE ORO CITY-Migrabe pa ang kasuko sa katawhan batok sa Cagayan de Oro Water District o COWD ug Rio Verde Consortium ning syudad.
Kini human nagpadala’g abiso ang maong water suppliers nga dugang napulo ka adlaw pa ayha makabalik sa normal ang tubig ilabina sa daghang brgy sa kasadpang bahin sa syudad ug lalawigan.
Gibutyag ni COWD Asst General Manager Engr Bienvenido Batar Jr nga maoy gi-rason sa Rio Verde nga nahitabo ang water crisis gumikan sa ilang pagtul-id sa naguba nga piple niini.
Una niini,usa ka reklamante dinhi sa Bombo Radyo ang mismo
migisa kang Batar kon kanus-a mahuman ang ilang pag-antos sa ka walay tubig nga
miluntad na sa pipila ka adlaw.
Samtang imbestigaran sa konseho aron manubag kon adunay pagpasagad ang kadagkuan sa COWD ug Rio Verde Consortium sa syudad sunod semana.
Kini human midangat sa komitiba ni Kag Bong Lao sa public utility sa konseho ang nagpungasi nga reklamo batok sa giingong inotil nga serbisyo sa maong mga buhatan.
Gusto masuta sa komitiba ni Lao kon nganong hangtod karon nag-antos pa gihapon ang libuang konsumante sa water district nga unta gisaad man nila niini ang maayo nga pag-alagad sa publiko.
Nasuta nga dili mominus sa kapin sa napulo ka brgy ug lakip ang lungsod sa Opol sa lalawigan ang nag-antos sa walay suplay sa tubig sulod ning semanaha.
