CAGAYAN DE ORO CITY- Gikumpirmar ni 8th IB Civil Military Operations head 1Lt Erwin Bugarin nga walay sundalong naangol sa engkwentro tali na sa militar ug rebeldeng NPA sa Brgy Kilometro 30 ug Brgy Hagpa sa Impasug-ong,Bukidnon.
Si Bugarin miingon nga adunay mga sundalong nasamdan apan dili igo sa bala kundi mga pangos-pangos lamang sa kalawasan.
Giatake sa mga rebelde nga naggikan sa Eastern Misamis Oriental-Northeastern Bukidnon Sub-regional Command ang duha ka mga detachment sa sundalo sa maong lugar.
Samtang giangkon ni Bugarin nga adunay mga armas nga nakuha ang mga rebeldeng New People’s Army sa dihang ilang giatake ang duha ka detachments sa Brgy Kilometro 30 ug Brgy Hagpa sa Impasug-ong,Bukidnon.
Siya miingon nga walay angayang kabalak-an tungod kay gamay lang nga armas ang nakuha sa mga armadong grupo.
Una nang gipanghimakak ni Impasug-ong Police Station commander Sr/Insp Sevilleno nga may nakuha nga unom ka nga high powered firearms ang mga rebelde.
Una niini,gibulgar ni Bugarin nga nakaalerto ang militar batok sa mga rebeldeng NPA.
Siya miingon nga ila nang gilauman ang sunod sunod nga himoong pagpangatake sa mga walhong grupo ilabina nga nagkadool na ang bulan sa Disyembre nga mao ang ilang anibersaryo.
Hisayran nga nawad-an na si Pres Rodrigo Duterte sa gana nga ipadayon ang peace talks tali na sa mga rebelde.
