CAGAYAN DE ORO CITY- Hulatan sa kapolisan ang resolution sa piskalya aron isaka sa city jail ang empleyado sa DENR-Cotabato tungod sa pagpayuhot sa gidiling droga ning syudad.
Giila ni Divisoria Police Station commander Sr/Insp Glenn Abalde ang suspek nga si Hakim Panadigan,24 anyos nga nagpuyo ning syudad.
Nasikop usab kuyog ni Panadigan ang kauban niini nga sila si An-Naif Caris Macaumbos, 24 anyos ug pulos molopyo sa Villa Angela Subdivision, Brgy Balulang sa syudad.
Nakuha sa posisyon sa mga suspek ang unom ka sachet sa shabu nga gibana bana P80,000 ang street value, P500 nga marked money ug ang mismong sakyanan ni Hakim.
Sa pikas bahin,wala tagda sa Cagayan de Oro Police Office o COCPO ang mga pagsaway gumikan sa ilang agresibong kampanya sa war on drugs sa syudad.
Gibutyag ni COCPO spokesperson C/Insp Mardy Hortillosa nga dili pa masabtan sa pipila ka pamilya kon unsa ang kabililhon ang ilang pagsanta sa mga illegal nga druga ning panahona.
Nagtoo si Hortillosa nga masabtan lamang kini oras nga dunay sakop sa ilang pamilya ang malambigit na niini.
Gani, gipasigarbo ni Hortillosa nga sukad nalusad ang kampanya batok illegal nga druga ni Pres Rodrigo Duterte, ang syudad lamang ang halos walay napatay mga suspek panahon sa entrapment operation taliwala sa pagsukol sa pipila.
