CAGAYAN DE ORO CITY- Ipatawag pagbalik sa konseho ang kadagkuan sa Cagayan de Oro Water District o COWD ug Rio Verde Water Consortium o RVWC ning syudad sunod semana.
Kini human subli gibakakan nila ang katawhan nga mabalik na ang suplay sa tubig sa kasadpang bahin sa syudad ug lalawigan.
Gibutyag ni Kag Bong Lao,chairman sa public utility sa konseho ning syudad nga dili makiangayon ang gihimo sa maong mga buhatan kay daw sama ra nga giilad nila ang katawhan.
Samtang gikompirmar ni COWD Asst General Manager Engr Beivenido Batar Jr nga dili pa gihapon makabaton sa panubig gikan sa Rio Verde Water Consortiom ang 45-mil ka konsumante ning adlawa.
Miingon si Batar nga subay sa ilang koordinasyon sa Rio Verde nga wala pa mahuman ang pagtul-id sa depektosong water pipe hinungdan sa dugang perhisyo sa katawhan.
Una usab niini,gipahibalo sa Bombo Radyo si Engr Joffrey Hapitan nga sulayan nila sa ikatulong higayon ang pag-andar sa ilang makinarya mismo alas 8:00 sa buntag ning adlawa.
Dugtong niini,giangkon ni COWD General Manager Engr Rachel Beja nga mibati sila’g dakong kaulaw sa ilang mga konsumante ning syudad.
Kini human napakyas sila pagpabalik sa normal nga suplay sa tubig subay sa gisaad sa Rio Verde kagahapong adlawa.
Miingon si Beja nga katungod sa katawhan nga masuko kanila tungod kay nahitabo usab ang dakong kakulangon sa ilang serbisyo.
