CAGAYAN DE ORO CITY-Giatake sa kapin 100 miembro sa rebeldeng New People’s Army o NPA ang security agency nga nakabantay sa Del Monte Philippines ug Davao Agricultures Ventures Corporation o DAVCO sa lungsod sa Quezon,Bukdinon.
Kini ang gibutyag sa Bombo Radyo ni SPO3 Reynold Bangcong,imbestigador sa Quezon Police Station nga usa sa mga guwardiya ang samaron human mabuthi’g improvised explosive device o IED sa mga rebelde.
Miingon si Bangcong nga gipugngan sa wala panganli nga sekyu ang mga rebelde aron dili makasulod sa compound sa kompanya apan IED explosion ang misugat niini.
Nadis-armahan ang mga nagbantay nga mga sekyu hinungdan nga hingpit nasulod ang compound ug gipangkuha ang mga armas.
Gikawat usab sa mga rebelde ang personal nga kabtangan sa mga empleyado hinungdan nga patung-patong nga atubangon nila nga kaso sa piskalya ning adlawa.
Naglisod pag-responde ang mga otoridad kay gibabagan sa dagkong trak ang mga kalsada isip blocking force.
Gisunog usab sa mga rebelde ang boom spray tractor, boom harvester, duha ka nurse trucks ug generator.
Kabahin sa gikompirmar sa kapolisan nga gikawat sa mga rebelde ang tulo ka shotguns ug 9mm pistol sa mga guwardiya.
Hisayran nga una nang gipamugos sa mga rebelde nga kinse ka sari-saring mga armas ang ilang nakuha dihang gilusob ang kompanya.
