CAGAYAN DE ORO CITY- Giila na sa grupong Solidarity Transport Alliance sa Northern Mindanao -Pinagkaisahang Samahan ng mga Tsuper at Operator nationwide o STAREX-PISTON nga milampos na sila pagpaabot sa ilang yangu-ngo ngadto sa gobierno.
Kini human nagpatuman na sa class suspension ang Dep-Ed tungod sa transport strike nga duha ka adlaw sugod ning adlawa.
Namahayag si STAREX Piston Northern Mindanao Sec Gen Ringo Lago nga padayon nila gisupak ang modernization program sa transportasyon diin nagtingu pagwagtang sa 15 anyos pataas nga public utility vehicles sama sa passenger jeeps.
Gitawag usab nila nga peke ug kontra kabus ang gihingusgan sa gobierno nga programa sa transportasyon.
Samtang gisupak ni Joel Gabatan,coordinator sa National Confederation of Transport Union o NCTU-Northern Mindanao ang mga pahayag ni Lago.
Gibutyag ni Gabatan nga dili maparalisar sa pundok ni Lago ang dagan sa transportasyon tungod kay mas daghan pa ang sakop sa NCTU itandi sa STAREX-PISTON.
Naglikay usab ang pundok ni Gabatan nga molusad sa lihok protesta tungod kay nakasumiter na sila’g mga rekisitos aron mapa-utang sila sa kooperatiba alang pag-modernize sa ilang mga sakyanan.
Kini nga mga dokumento na-submitar na sa DOTr sa kauluhan.
Sa pikas bahin,gitawag nga walay hinungdan sa grupong Traffeco ang duha ka adlaw nga transport strike sa Starex-Piston Northern Mindanao ilabina dinhi sa syudad.
Gibutyag ni Traffeco spokesperson Lalaine Escobidal nga maoy angay buhaton sa grupo ni Ringo Lago ang pag-lobby sa kongreso aron ipaabot ang ilang pagsupak sa modernisasyon sa transportasyon.
Gipasalig sa Traffeco nga normal ang ilang mga pagpamasahero aron dili mabalda ang mga biyahe sa mga sumasakay ilabina sa dakbayan.
Dugtong niini,mitanyag sa free ride ang Land Transportation and Franchising Regulatory Board o LTFRB-10 alang sa mga pasahero nga ma-stranded sugod ning adlawa.
Gipasalig ni LTFRB regional director Allan Guro nga kanunay sila andam inabagan sa LTO ug RTA nga makapadagan sila’g mga bus sa mga tawo nga dunay trabaho ning adlawa.
Gi-angkon ni Guro nga gikan sa pribadong kompanya ang bus nga ilang gihangyo alang sa mga pasahero nga matanggong sa ilangm ga biyahe.
Dugtong niini, gihangyo ni Guro ang mga raliyesta nga dili magbutang ug suyak aron dili sila makakita’g away.
Samtang alerto ang kapolisan sa ilang pagbantay sa transport strike nga gilusad sa grupong STAREX Piston Northern Mindanao sa syudad ning adlawa.
Gibutyag ni C/Insp Mardi Hortillosa,tigpamaba sa Cagayan de Oro City Police Office nga ila kining himoon sa pagsiguro nga mamintinar ang kahusay’g kalinaw sa maong kalihukan.
Partikular nila hataga’g pagtagad ang choke points sa mga raliyesta bisan nga giingong walay nahuptang permit alang sa transport strike.
Gumikan niini,gisuspenso sa Dep-Ed-10 ang tanang klase ning adlawa sa tibook Pilipinas.
Kini ang gibutyag ni DepEd regional director Dr Allan Farnazo diin gitinguha usab nila mahangyo ang transport group nga kutob lamang ning adlawa ang undang-pasada.
Dugang ni Farnazo nga managlahi ug localize ang pag-deklarar sa duha ka adlaw nga undang pasada sa grupo sa mga transport union sa matag rehiyon.
Gihimo ni Farnazo ang maong pagtin-aw, taliwala pa man sa pagpakanaug sa Malakanyang sa usa ra ka adlaw nga suspensyon sa klase tungod sa strike.
