CAGAYAN DE ORO CITY-Gipa-alerto mismo ni Pres Rodrigo Duterte ang puwersa sa kapolisan ug militar ilabina sa Northern Mindanao tungod sa seryoso nga bahad bombahan sa sympathizers sa Maute-ISIS group.
Kini bisan nga nahurot na sa pagkamatay ang maong mga terorista sa Marawi City.
Gikompirmar ni PNP regional spokesperson Supt Lemuel Gonda nga dili ordinaryo ang impormasyon nga nag-abot sa Malakanyang nga giyagyag ni Duterte hinungdan nga gitugyan nila kini sa intelligence community.
Una nang nagpadumdom si Duterte ning semanaha nga dili mohimo’g kumpiyansa ilabina sa mga pagdalikyat sa pampublikong mga lugar ug pagtambong sa mga pagtigom-tigom sa palibot.
Samtang may security plan na kapolisan inabagan sa militar alang sa ilang ilusad nga OPLAN Kalag-Kalag sa syudad sugod Oktobre 31 hangtud Nobyembre 2 ning tuiga.
Gibutyag ni C/Insp Mardy Hortillosa II,tigpamaba sa Cagayan de Oro City Police Office o COCPO nga hugot nga koordinasyon ang ilang himoon sa govt officials ilabina sa mga barangay nga dunay mga sam-ang sa syudad.
Gawas niini, may deployment na alang seguridad sa mga paseherong mupadulong sa pantalan ug terminal sa bus sa dili pa ang kalag-kalag.
