CAGAYAN DE ORO CITY-Panguluhan ni PNP regional director C/Supt Timoteo Pacleb ang pagsusi sa preparasyon sa kapolisan aron mahatagan sa igong seguridad ang katawhan nga moduaw sa nagkadaiyag menteryo dinhi sa rehiyon.
Gibutyag ni PNP regional spokesperson Supt Lemuel Gonda nga partikular nga susihon ni Pacleb ang mga dagkong sam-ang dinhi sa syudad ug Misamis Oriental.
Katuyuan niini nga ma-assess ni Pacleb ang kakulangon ug gilayong mahagatan sa sulbad samtang wala pa mosulod ang mismong adlaw sa mga santos ug kalag ning semanaha.
Dinhi sa syudad,ang city memorial park sa Brgy Camaman-an ang adunay labing daghang katawhan nga moduaw diin gibana-banang moabot sa 20 hangtod 30-mil matag-tuig.
Samtang all systems go na ang traffic scheme nga ipatuman sa Roads and Traffic Administration o RTA ilabina diha sa Bolonsori Cemetery sa Brgy Camaman-an ning syudad.
Giangkon ni RTA administrator Engr Nonito Oclarit nga mas gihatagan nila’g bug-at nga pagtagad ang mga dagkong menteryo.
Gibutyag ni Oclarit nga sugod ning adlawa, ila nang imuntar ang mga barandilya ug dugang road signs alang sa ipatumang re-routing sa mga dalan nga dagsaan sa mga muduaw sa mentertyo sa Bolonsiri.
Samtang giawhag ni Cagayan de Oro Archbishop Antonio Ledesma ang mga Kristiyano nga ipadayon ang mga pag-ampo alang sa mga kabanay ug isig-katawo nga mipanaw sa laing kalibutan.
Gihimo ni Ledesma ang pag-aghat mismo sa besperas sa pagdumdom sa adlaw sa mga santos ug kalag.
Miingon ang obispo nga kini ang haom nga panahon aron mapalig-on pa ang mga pangaliya sa katawhan sa kahitas-an alang sa isig-katawo nga nagkinahanglan pag-ayo niini.
Dugang ni Ledesma nga mapasayon kini pinaagi sa pagpangayo’g tabang ug pakighiusa sa mga santos sa kalangitan.
