CAGAYAN DE ORO CITY-Katunga sa presyo sa mga bulak ang miusbaw sa nagkadool na nga kasaulugan sa adlaw sa mga santos ug kalag.
Kini ang kumpirmasyon sa usa sa mga tag-iya og flower shop dinhi sa dakbayan.Matud ni Ramil Auxtero, sa ATM Flower Shop anaa sa P300 pesos ang presyo sa bulak nga Malaysian mums gikan sa P150 sa miaging adlaw.
Lakip usab nga misaka ang presyo ang bulak nga anasthasia ug uban pa tungod sa ilang supplier.
Apan gitin-aw niini nga nagpabilin sa P10 ang matag stalk sa bulak nga rose tungod kay matag Valentines Day lamang kini gamahal.
Samtang walay pag-irog sa presyo sa “pilit” sa nagkadool na nga kasaulugan sa adlaw sa mga santos ug kalag.
Kini human ang “pilit” maoy sagad gapaliton sa publiko sa maong panahon.
Sumala sa negosyante nga si Emma Kyap nga walay paglihok sa presyo sa pilit ug nagpabilin kini nga P75 kada-kilo.
Apan gibutyag niini nga maoy mimahal ang presyo sa ”tapol” tungod sa hinay nga supply niini ug daghan usab ang gapamalit matag adlaw dili lang panahon sa Undas.
