CAGAYAN DE ORO CITY-Nasikop sa hiniusang puwersa sa militar ug kapolisan ang kapikas ug unom ka anak sa napatay’ng si Omar Maute sa Brgy Tubod,Iligan City kaganihang buntag.
Giila ni Iligan City Police Office Director Sr Supt Leony Roy Ga ang suspek nga si Minhati Madrais alyas Baby,Indonesian national nga nag-abang sa usa ka pinuy-anan sa maong syudad.
Gibutyag ni Ga nga gikustodiya usab nila ang upat ka anak babaye ug laing duha ka anak lalaki sa suspek sa DSWD-10 samtang nagpadayon ang proseso ang pagduso’g kaso.
Si Madrais ang kabahin sa gimando ni martial law administrator Defense Sec Delfin Lorenzana nga ipadakop tungod sa nahitabo nga kagubot sa Marawi City diin kapin libo ka tawo ang nakalas.
Una niini,nag-usa ang mga special unit sa PNP-10 ug AFP pinaagi sa Joint Task Force Ranao hinungdan sa pagkasikop sa kapikas ni Maute.
