CAGAYAN DE ORO CITY-Kasuhan na sa PDEA-10 sa pagsupak sa pagbaton sa
dangerous drugs ang 30 anyos nga negosyante nga nasikop sa hiniusang operasyon sa
mga otoridad sulod sa airport sa Laguindingan,Misamis Oriental.
Kini human nakuha gikan kang Ralph Martin Rafanan nga taga- Brgy 21 ning syudad ang 17 ka suspected ecstasy nga gikan pa sa kauluhan.
Miingon si PDEA agent Ben Calibre nga mismo ang tropa ni City Intelligence Unit head C/Insp Ariel Philip Pontillas ang mipahibalo kanila kabahin sa kalihukan
ni Rafanan hinungdan gilayon gikasa nila ang pagsikop niini kagahapon sa
buntag.
Hinoon,giingong giangkon usab ni Rafanan kinsa anak sa brgy kapitana sa Brgy 21
nga si Gigi Go nga siya ang tag-iya sa suspected ecstasy nga nakompiskar sulod sa iyang baggage.
Samtang gi-awhag sa PDEA-10 ang tanan city bar owners nga makigkoordinar
kanila oras nga duna sila’y mamatikdan nga customers nga migamit sa ilegal nga druga sulod sa ilang mga patigayon.
Miingon si Calibre nga magsilbi untang leksyon ang pagdakop kang Rafanan nga nakuhaa’g 9 gramos sa ecstacy pills sulod sa daghang bar ning syudad.
Dili magduha duha ug ronda ang PDEA oras nga duna silay makuhang tip sa mga
ginadiling druga nga gamiton sa mga kabatan-onan sulod sa mga bar.
Dili usab sila magduha duha ug pasakag kaso sa bar owners nga nasayod o gipasagdan ang pagpayuhot sa mga sosyal nga mga klase sa ginadiling druga sulod sa ilang diskohan o imnanan.
