CAGAYAN DE ORO CITY-Kasuhan sa kapolisan sa murder ang custom broker ingon man ang driver niini sa piskalya sa syudad sa sunod semana.
Kini human kumbinsido si Sr/Insp Abdul Alim Sumandar,hepe sa Macasandig Police Station nga mismo si Jo-ed Pasasadaba ug Seifred Roxas ang mipusil-patay sa biktima nga si Roy Ancajas.
Gibutyag ni Sumandar nga nahuptan na nila ang mga testigo nga magtudlo sa mga suspek nga responsable sa kremin.
Nakuha usab ang duha ka 45 nga kalibre nga armas nga gitaguan ni Roxas sa kasagbutan sa Baksuhan,Brgy Macasandig ning syudad sa miaging gabii.
Samtang dili konektado sa Bureau of Customs District 10 ang biktima nga si Ancajas nga napusilan-patay sa Baksuhan,Brgy Macasandig sa syudad sa miaging gabii.
Katin-awan kini ni BoC District 10 Police head Lt Roman Miscoso dihang naghupot sa ID si Ancajas gikan sa ilang ahensiya.
Mitin-aw ni Miscoso nga peke ang gigamit nga ID sa napatay nga biktima ilabina nga dili otorisado ang usa ka customs police nga mag-isyu niini nga wala mu-agi sa central office.
Gibutyag ni Miscoso nag wala siya sukad makahimamat kang Ancajas, gawas kang Pasasadaba kinsa ilado ug lisensyadong customs broker nga regular magtransak sa ilang buhatan.
Dugtong niini,pahimutanga’g dugang mga pulis ang lugar diin natigayon ang pinusilay tali sa customs broker ug impostor nga customs police officer diha sa Brgy Macasandig ning syudad.
Kini human nag-resulta sa kamatayon ni Ancajas ang pinusilay diin duha ka suspek ang ubos sa kustodiya sa kapolisan.
Miingon si C/Insp Mardy Hortillosa,tigpamaba sa Cagayan de Oro City Police Office o COCPO nga posibleng mabutangan sa dugang mga puwersa ang mga lugar nga kaniadto walay makitang mga pulis.
Kini tungod kay nagtoo sila nga sagad mahitabo ang mga krimen sa mga lugar nga gitoohan sa mga kriminal nga walay magpatrolya nga pulis.
Lauman usab ang kabag-uhan sa ilang schedule sa police visibility, pagpatrolya lakip na ang ilang panawagan sa dugang civilian volunteers nga mutabang magbantay sa mga lugar nga sagad mahitabo ang mga tagong krimen.
