CAGAYAN DE ORO CITY-Giawhag ni Regional Peace and Order Council o RPOC chairman City Mayor Oscar Moreno ang publiko nga suportahan ang kamulo nga Dugong Bombo project diha sa Atrium,Limketkai sa syudad sugod karong buntag.
Gihimo ni Moreno ang awhag dungan sa pag-congratulate niini sa Bombo Radyo ug ubang support groups aron magmalapuson ang kalihukan.
Gani,gimando niini nga hataga’g insentibo ang city hall employees nga makuhaa’g dugo sa maong proyekto.
Samtang gidayeg ni Misamis Oriental Gov Bambi Emano ang tinuig nga Dugong Bombo nga gihimo sa Bombo Radyo ning syudad.
Gikalipay ni Emano ang maong proyekto kay nagkahulugan nga daghang kinabuhi sa mga pasyente ang maluwas samtang madala sa ospital.
Giawhag usab niini ang katawhan sa kapi’g 400 ka brgy sa lalawigan nga dili pakyason ang ilang suporta diin siya personal modalikyat kuyog sa capitol employees sa Atrium ning adlawa.
Una niini,mismo si PRC national medical officer Dr Federico Castillo ang nag-awhag sa mga indibidwal nag-edad 16 hangtod 65 anyos nga modonar sa dugo alang sa labing dako nga dugu-ong kalihukan sa Bombo Radyo ug Star FM stations tibuok nasud ning adlawa.
#dugongbombo2017
