CAGAYAN DE ORO CITY-Gipasalig na sa Department of Public Works and Highways o DPWH-10 nga hapit na mabutanga’g street lights ang coastal road sa Brgy Gusa ning syudad.
Matud ni DPWH spokesperson Vinah Maghinay nga nakigkoordinar na ang ilang ahensiya sa lokal nga kagamhanan sa syudad kalabot sa pondo nga gikinahanglan sa instulasyon sa mga suga ingon man ang pagbayad sa billing matag bulan.
Siya miingon nga maoy trabaho sa DPWH ang pag-install sa mga suga.
Samtang gihangyo ni Maghinay ang mga opisyal sa Brgy Gusa nga mohimo’g lakang aron malikayan ang mga krimen nga posibleng mahitabo sa coastal road ilabina nga wala pay suga.
Siya miingon nga kinahanglang adunay ipatuman nga curfew aron malikayan ang mga nagkadaiyang krimen ingon man disgrasya sa kadalanan sa maong lugar.
Giawhag usab ni Maghinay ang publiko nga suportahan ug tumanon ang mga ordinansa nga gipatuman sa Barangay Gusa.
Gipasalig usab si Cagayan de Oro City Police Office o COCPO nga kanunay magpatrolya ang kapolisan sa coastal road sa nasangpit nga dapit.
Si COCPO spokesperson C/Insp Mardi Hortillosa miingon nga gawas sa pagbantay sa mga posibleng krimen nga mahitabo, gibantayan usab nila ang mga car racing sa maong lugar.
Gibutyag niini nga bisan kulang ang ilang personahe, paningkamutan nila nga mamintinar ang kahapsay ug kalinaw sa maong lugar bisan paman walay street lights.
