Giangkon sa teroristang New People’s Army o NPA nga napukan sila sa tropa sa gobyerno sa ilang gihimong pag-atake sa municipal police station nga gikaangol sa upat ka pulis sa Binuangan, Misamis Oriental.

Gidayeg ni North Central Mindanao Region o NPA-NCMR spokesperson Ka Malem Mabini ang mga personahe sa Binuangan Police Station tungod sa gipakitang kaisog sa pagdepensa sa ilang istasyon.

Siya miingon nga ilang gilusad ang tactical operations aron kuhaon ang mga armas sa pulis ug ipakita kang Pres Rodrigo Duterte ang ilang pagkadismaya human sila gitawag nga mga terorista.

Apan gitin-aw ni Mabini nga bisan wala sila milampos sa ilang kausa, nagbahad kini nga daghan pang police stations ug kampo sa militar ang ilang atakehon.

Una nang mihatag kamanduan si PNP regional director C/Supt Timoteo Pacleb sa tanang kapolisan nga dili magpapildi sa mga teroristang NPA panahon sa engkwentro.

Gihimo ni Pacleb ang panawagan nunot na usab sa bahad sa mga rebelde nga daghan pang police station ang ilang atakehon gawas sa Binuangan MPS.

Og bisan paman nga gidayeg ni Ka Malem ang kalig-on sa pwersa sa kapolisan sa pag-protehir sa ilang istasyonan, apan gisaway niini ang paagi sa intelligence monitoring sa maong ahensya.

Si Ka Mabini miingon nga walay kamatooran ang gipasiatab sa kapolisan nga tungod sa ilang lig-on nga intelligence gathering maoy hinungdan nga wala sila milampos sa pagpangatake.

Gitawag ni Mabini nga huyang ang intelligence community sa kapolisan tungod kay naka-penetrate sila sa area.