CAGAYAN DE ORO CITY-Gipanganti ni retired AFP chief of staff ug karon DILG Undersecretary Eduardo Año nga pulbos na ang CPP-NPA pag-abot sa tuig 2018.
Panganti kini ni Año atol sa pagtunol niya’g pasidungog sa grupo ni Binuangan Police Station commander Sr/Insp Dante Hallazgo sa Binuangan ning lalawigan.
Miingon si Año nga dugang military batallion ang mugnaon sa gobierno aron moabag sa PNP sa pakigbatok sa mga rebelde.
Himoon usab sa DILG nga ehemplo ang gipakitang kaisog sa grupo ni Hallazgo aron maabog ang kapin gatos nga NPA rebels nga tuyo moilog sa ilang estasyon sa miaging Disyembre 3 sa kadlawon.
Samtang dili tiaw ang nahimong posisyon sa kapolisan nga sakop sa Binuangan Police Station aron mabatukan ang rebeldeng NPA nga miatake kanila.
Kini ang subli pagbalik lantaw ni Hallazgo sa maong police station diin kuyog ang mga babayeng pulis nga frontliners batok pag-atake sa NPA sa ilang headquarters sa milabay’ng Domingo.
Giangkon ni Hallazgo nga labihan ka isog ang ilang mga babayeng pulis ug nakadayeg siya kanila.
Una niini, gi-angkon usab ni Hallazgo sa Bombo Radyo nga daw gikaminusan sila sa mga sakop sa NPA sa pagtoo nga dali ra nila mapuhag ang ilang istasyon ug dali ra sila maka- withdraw sa ilang tropa matag-higayon nga dili na magsilbi ang ilang armas.
