CAGAYAN DE ORO CITY-Giawhag ni PNP regional spokesperson Supt Lemuel Gonda ang publiko nga dili angay mohatag kumpiyansa sa seguridad bisan napatay na sa gobyerno ang tag-as nga lider sa grupong Maute-ISIS nga responsable pag-atake sa Marawi City.
Kini tungod kay may mga bag-ong mibarog nga lideres sa grupo isip hulip kanila ni Isnilon Hapilon ingon man sa magsoong Omar ug Abdullah Maute.
Kini ang hinungdan nga namugos si Gonda nga gikinahanglan pa ang paglugway sa martial law aron pugngan ang mga pagpanghasi sa mga terorista sa Mindanao.
Gani,tukion pinaagi sa joint special session sa kongreso ang hangyo ni Pres Rodrigo Duterte nga usa ka tuig nga extension sa martial law sa kauluhan ning adlawa.
Samtang dako’g ikatabang aron mamintinar ang kahusay’g kalinaw sa katawhan ang extension sa martial law partikular sa Marawi City ug kalungsuran sa Lanao del Sur.
Kini ang pag-angkon ni Marawi City Police Office Director Supt Ebra Moxsir ilabina nga lahi ang kultura sa mga
Maranao Muslim nga nakabase sa maong syudad.
Miingon si Moxsir nga angayan lamang ipabilin ang daghang mga sundalo ug mga pulis ilabina nga may pipila ka sakop sa grupong Maute-ISIS nga naka-eskapo sa pagpulbos sa militar ug padayong mihimo’g recruitment sa mga bag-ong miembro aron subli mo-atake sa gobierno.
Samtang subli nanganti ang mga progresibong pundok nga supakon nila ang paglugway sa dugang sa ka tuig sa martial law sa Mindanao.
Kini human gitawag ni Bayan Northern Mindanao Sec Gen Wildon Barros ang liderato sa kongreso nga nagsunod-sunod na lamang sa kagustuhan ni Pres Rodrigo Duterte.
Namugos si Barros nga angay magbinantayon ang publiko sa mga gihimo ni Duterte aron kalikayan nga mapaubos diktadoryang pagdumala ang nasud pag-abot sa panahon.
