CAGAYAN DE ORO CITY-Gikompirmar ni Cagayan de Oro City Police Office o COCPO spokesperson C/Insp Mardi Hortillosa nga hinay ang dagan saimbestigasyon sa kasong pagpatay kang University of Science and Technology of Southern Philippines (USTP) ug Philippine Association of State Universities and Colleges (PASUC) President Ricardo Rotoras.
Kini tungod kay nag-amping ang mga imbestigador sa pagtumbok sa mga suspek sa krimen.
Matud ni Hortillosa nga ayha pa gisusi sa Task Force Rotoras ang opisina niini sa pagtoo nga may makuhang ebidensiya.
Nakapalangan usab sa ilang imbestigasyon ang cellphone sa biktima nga hangtud karon dili pa nila maablihan tungod sa mga technical difficulties.
Una nang gibutyag ni C/Insp Hortillosa nga wala pay nagpatim-aw nga witness taliwala paman sa P2.5 million nga reward money.
Samtang, giubsan sa COCPO ang alert level kalabot na sa ilang pagpangandam sa paghatag seguridad sa dakbayan ning panahon sa pasko ug bag-ong tuig.
Gibutyag ni COCPO spokesperson C/Insp Hortillosa nga bisan ilang giubsan sa alert level 3 ang ilang pagpangandam, gipasalig niini nga nagpabiling hugot nga seguridad ang ilang gipatuman sa dakbayan batok na sa mga rebeldeng New People’s Army.
Una nang gibutyag ni Hortillosa nga maoy ilang gibantayan ang mga vital installations ug usa na niini ang mga simbahan nga sagad dagsaan sa daghang mga tawo ning panahona.
