CAGAYAN DE ORO CITY- Walay garantiya ang kapolisan nga dili mahimong dugu-on ang subli nila paglusad sa anti-drug operations batok sa drug pushers ning syudad.
Kini human opisyal nang gimando ni PNP chief Dir Gen Ronald de la Rosa sa tanang regional directors nga ibalik na ang aktibo nga war on drugs sa nagkadaiyang lugar sa nasud.
Miingon si C/Insp Mardi Hortillosa,tigpamaba sa Cagayan de Oro City Police Office o COCPO nga dili mahimo nga magpasagad lamang sila kontra armadong drug pushers kon namiligro na ang ilang mga kinabuhi sa matag-operasyon.
Kini ang hinungdan nga gihangyo nila ang mga tawo nga nalambigit sa pagbaligya’g droga nga moundang na aron kalikayan ang dugu-on nga anti-drugs operations.
Samtang gi-depensa sa PNP-10 ang minus nga resulta sa anti-illegal drugs operasyon sa nagkadaiyang probinsya dinhi sa rehiyon.
Kini bisan nga sukad petsa 15 pa sa Disyembre ning tuiga gibalik ang war on drugs batok sa mga tawo nga responsable pagpayuhot sa gidiling droga.
Miingon si PNP regional spokesperson Supt Lemuel Gonda nga una na gani naka-kompiskar ang Ozamiz City Police Office sa 14 kilos sa shabu gikan sa mga Parojinog bisan wala pa opisyal gibalik ang war on drugs.
Namahayag si Gonda nga abli usab sila paggamit sa body camera samtang may operasyon aron magamit usab nga depensa batok sa harassments gikan sa ilang mahimong mga dinakpan.
