Cagayan de Oro City-Lubog sa tubig-baha ang 18 ka lungsod sa Misamis Oriental og 23 ka barangay sa Cagayan de Oro City.
Kini human mibundak ang ulan nga dala ni bagyong Vinta sa syudad og probinsya.
Gibutyag sa Bombo Radyo ni PDRRMD head Fernando Dy Jr nga anaa sa 3,049 ka pamilya o 10,475 individual ang nanghikling sa nagkadaiyang evacuation centers human nabahaan ang ilang mga panimalay sa lalawigan.
Gikumpirma usab ni Dy nga nagpadayon pa ang ilang pagpangita sa tulo ka mangingisda nga na-missing sa kasagsagan sa dautang panahon.
Dugtong pa sa opisyal nga nag hulat pa sila sa opisyal nga report kalabot sa namatay nga bata sa dihang gianak kini sa lungsod sa Balingasag.
Dili pa nila mabutyag kung ipailalom ba sa state of calamity ang lalawigan labi na kay walay natala nga pagkadaut sa imprastraktura og pag kuso-kuso sa baha sa mga umahan sa mga tawo.
Ang mga nabahaan ang gilangkuban sa Kinoguitan, Binuangan,Talisayan, Balingoan, Lagonglong, Alubijid, Balingasag, Salay, Jasaan, Villanueva, Claveria, Naawan, Lugait, Tagoloan, Opol, El Salvador City, Gingoog City og Manticao.
Samtang miabot sa atop sa mga balay ang gitas-on sa tubig-baha nga nasinatian sa pipila ka barangay sa Cagayan de Oro City.
Kini ang hinungdan nga mismo si City Mayor Oscar Moreno ang mimando sa mga residente nga manghikling padulong sa mga designated evacuation centers.
