CAGAYAN DE ORO CITY- Gilaraw sa Associated Labor Unions-Trade Union Congress of the Philippines o ALU-TUCP nga iduso ang petisyon sa usbaw sa suhulan sa mga mamumuo ning syudad.
Gibutyag ni ALU-TUCP regional operations director Nicanor Borja nga mapugos sila’g duso sa maong petisyon tungod sa pag-implementar sa Tax Reform for Acceleration and Inclusion o TRAIN.
Gitin-aw ni Borja nga dunay maayo ug dautang epekto ang bag-ong reporma sa buluhisan nga gipatuman sa Duterte administration.
Apan ilang gisupak ang pagsaka sa presyo sa mga batakang palaliton epekto sa maong balaod.
Samtang gi-depensa ni City Mayor Oscar Moreno ang TRAIN Law nga nagsugod na pag-epekto sa nasud.
Miingon si Moreno nga importante usab ang pagbaton sa buhis aron makalihok ang gobierno sa pagtunol sa serbisyo.
Kumbinsido si Moreno nga ang maong balaod ang gitumong sa pagpalig-on sa ekonomiya pinaagi sa mga katukuran sa nagkadaiyang imprastraktura ilabina sa Mindanao.
