CAGAYAN DE ORO CITY- Molusad sa signature campaign ang mga lehitimong operator sa Small Town Lottery o STL aron hangyoon si DILG Sec Eduardo Ano ug Dir Gen Ronald de la Rosa nga paphaon ang PNP officials nga inotil pagsumpo sa illegal nga pasugal ning syudad.
Kini human gibulgar ni Astrid Bana,presidente sa Misamis Oriental-Cagayan de Oro STL Agents Association nga naghitak ang mga illegal nga outlets diin naka-apektar sa ilang mga kinitaan.
Miingon si Bana nga gikalipay nila ang gipakusog nga anti-illegal gambling operations sa PNP apan dili sila kumbinsido kon molahutay kini.
Kini ang hinungdan nga kuyog sa Diamond Mellimium Corporation nga franchisee sa PCSO,gikondinar nila ang mga illegal nga STL outlets nga misabotahe sa ilang lehitimong operation sa syudad ug Misamis Oriental.
Samtang gihagit sa kapolisan ang grupo sa mga lehitimong operator sa STL nga huptan ang lig-ong mga ebedensiya.
Kini sa dili pa sila mohimo’g signature campaign diin nagtumong pagpatangtang sa kadagkuan sa PNP kon pabiling pakyas pagbungkag sa illegal STL outlets sa syudad ug lalawigan.
Miapelar si C/Insp Mardi Hortillosa,tigpamaba sa Cagayan de Oro City Police Office o COCPO nga angayang ilhon una’g maayo sa legitimate STL operators ang mga karibal nila nga illegal aron dili usab mabutang sa alanganin ang kapolisan.
Una nang nagmando si PNP regional director sa ONE STRIKE POLICY sa tanang provincial ug city police directors nga mapakyas pagbungkag sa tanang illegal gambling games sa rehiyon.
