CAGAYAN DE ORO CITY-Gibasol ni Misamis Oriental Vice Gov Joey Pelaez ang mga opisyal sa matag-lungsod kon nganong hangtud karon dili pa mahimo maka’isyu’g franchise ang LTFRB sa mga van.
Si Pelaez miingon nga nagpaggawas sa memorandum ang Department of Transportation o DoT nga nagmando sa mga opisyal sa matag munisipyo nga magpasar sa comprehensive Local Transport Plan o CLTP ug Local Public Transport Route Plan o LPTRP nga hangtud karon walay bisa’g usa ang nakapasa sa Sangguniang Panlalawigan.
Samtang gibutyag ni LTFRB-10 regional director Allan Guru nga naa nay mga rota ang ilang giandam isip pagtuman sa gipangayo sa Department of Transportation kon DoT.
Si Guru miingon nga maoy ilang himoon karon mao nga pangutan-on ang matag LGU sa tibook Region 10 sa ilang mga rota aron walay overlapping nga mahitabo.
Hisayran nga naghitak karon ang mga colorum nga van sa tibook Misamis Oriental tungod sa pagpahunong sa franchising sa mga van.
