CAGAYAN DE ORO CITY-Kasuhan ni kanhi Cagayan de Oro Water District o COWD General Manager Engr Rachel Beja ang naglangkob sa board of directors o BoD.
Kini tungod sa giingong illegal pagtangtang kang Beja isip general manager sa ahensiya.
Miingon ang abogado ni Beja nga si Atty Mary Camille Perez-Quililan nga gihulat na lamang nila ang findings sa Civil Service Commission sa ilang petition for review sa termination order nga gipakanaug sa COWD board of directors.
Si Beja ang wala na mo-report sa iyang trabaho dihang gidid-an na makasulod sa mismong opisina niini sa COWD.
Samtang katungod sa COWD board of directors ang pagtangtang kang Beja isip general manager sa ilang ahensiya.
Kini ang pagpasabot ni acting COWD General Manager Engr Beinvenido Batar Jr alayon sa termination order sa board of directors batok Beja.
Nagdumili si Batar pagkomento sa plano ni Beja nga sila kasuhan apan siya masaligon nga dili unta moabot sa maong punto.
