CAGAYAN DE ORO CITY-Gimando ni acting City Police Director Sr/Supt Nelson Aganon sa tanang mga police station commander sa matag presinto nga pahugtan ang pagpatuman sa checkpoint ubos sa ilang area of responsibility.
Kini sa tumong nga dili na masubli pa ang nahitabo sa kasong pagtulis-patay sa anak sa kanhiay police general kinsa nag-bank withdraw sa Umalag Bridge, Brgy Tablon ning syudad kagahapon sa hapon.
Si Aganon miingon nga dako ang iyang pagtoo nga nagkulang ang mga pulis sa ilang “police visibility” hinungdan nga nahitabo ang krimen ug dali nakasibat ang mga suspek.
Ubay-ubay usab ka mga anggulo ang gipa-imbestigahan ni acting Aganon sa maong hitabo.
Sumala pa ni Aganon nga kabahin sa ilang giimbestigahan ang posibilidad nga pagdumot ang motibo sa krimen gawas sa anggulo nga pagpanulis.
Gipasalig sa opisyal nga motabang siya sa imbestigasyon aron mapadali ang pagsulbad sa kaso.
Una nang nagtoo ang kanhi police general nga posibleng inside job ang pagtulis-patay sa iyang anak nga si Robert Luz, minyo ug nagpuyo sa Brgy San Antonio, Jasaan, Misamis Oriental.
