CAGAYAN DE ORO CITY-Patay ang tulo ka tawo nga gilakipan sa duha ka menor de edad samtang ang usa ang kritikal sa nahitabong aksidente sa may Barangay Sugbongcogon, Tagoloan, Misamis Oriental.
Dead on the spot ang drayber sa motorsiklo nga si Reden Magdadaro, 23-anyos, taga Tin-ao, Agusan ning syudad ug ang backride niini nga sila si Alisa Rose Fuentes, 12-anyos ug Angel Tablan, 14-anyos samtang padayon pang gitambalan ang usa ka Shanna Mae Valencia, 12-anyos.
Matud ni Sr/Insp. Allan Oniana, ang deputy station commander sa Tagoloan Police Station nga nahitabo ang madugo nga aksidente sa dihang gibangga ang gisakyang motorsiklo sa mga biktima sa ten-wheeler truck nga gimaneho ni Juri Saberon, 30-anyos, residente sa Poblacion Valencia City, Bukidnon ug nakaparada sa tunga sa kalsada.
Gibutyag ni Oniana nga ubay-ubay ka violations ang giatubang sa drayber nga si Saberon gawas sa kasong reckless imprudence resulting to multiple homicide.
Si Oniana miingon nga dako’g tulubagon si Saberon tungod sa gihimo niini nga pagparada sa sakyanan tunga sa dalan nga walay mga warning device.
Gisuta pa karon sa mga pulis ang posibilidad nga hubog ang gamaneho sa motorsiklo hinungdan sa aksidente.
