CAGAYAN DE ORO CITY-Suspendido ang duha ka empleyado sa city hall nga nadakpan sa kalambigitan sa paggamit ug pagbaligya’g gidiling droga ning syudad.
Kini human unang nasikop si Joeffrey Seirra nga taga- Brgy 7 ug gisundan ni RTA enforcer Nelson Rimontigue Jr nga taga-Brgy Macasandig sa dakbayan sa miaging gabii.
Gibutyag ni City Administrator Teddy Sabugaa nga otomatikong ipaubos sa suspension ang duruha samtang detinado tungod sa atubangan nga kaso sa korte.
Miingon si Sabugaa nga kon makapiyansa ang duruha,ipaubos kini sa administrative investigation aron basehan kon angay taktakon o ipabilin sa ilang mga trabaho.
Una nang gilusad ang mandatory surprise drug testing sa tanang mga empleyado aron pagsiguro nga ‘drug-free’ ang working environment sa dakbayan.
Nasayran nga sukad milingkod si City Mayor Oscar Moreno,ubay-ubay nang city hall employee ang nasapon nga tiggamitan ug tigbaligya’g gidiling droga ning syudad.
