CAGAYAN DE ORO CITY-Gi-monitor sa militar kadtong mga incumbent official o bisan mga kandidato nga mosanong sa demanda sa rebeldeng New People’s Army o NPA nga mohatag sa permit campaign fee sa rehiyon.
Kini alayon sa nagkaduol nga brgy ug sk elections sa Mayo 14 ning tuiga.
Miingon si 4th ID spokesperson 1Lt Tere Ingente nga gitahasan nila ang ilang grounds commanders aron sutaon ang mga elected official nga mohatag sa demanda sa NPA.
Awhag ni Ingente nga unta dili ibotar sa mga botante kadtong mga kandidato nga dunay pagdapig sa mga rebelde dinhi sa rehiyon.
Samtang gipalig-on sa PNP-10 ang ilang koordinasyon sa 4th ID,Philippine Army aron mas mahatagan pa sa hugot nga seguridad ang brgy ug sk elections sunod bulan.
Kini human gilauman sa PNP nga mohimo’g posibleng kasamok ang rebeldeng New People’s Army o NPA aron masabotahe ang pagpahigayon sa piliay sa Mayo 14 ning tuiga.
Gibutyag ni PNP regional spokesperson Supt Lemuel Gonda nga hinoon wala pa’y tataw nga taho apan naniguro na silang daan aron dili mabalda ang pagpili sa katawhan sa umaabot brgy ug sk elections sa rehiyon.
