CAGAYAN DE ORO CITY-Gilugwayan sa Commission of Elections o Comelec ang pagduso sa certificates of candidacy o COC sa mga kandidato sa Barangay ug Sangguniang Kabataan o SK elections.
Gi-post ni Comelec commissioner Rowena Guanzon sa iyang Twitter account, nga imbes kagahapong adlawa ang deadline sa COC filing, ila kining gisibog hangtud ning adlawa.
Gibutyag ni Comelec spokesman James Jimenez, nga nagsumikad ang paglugway sa Comelec en banc sa COC filing sa hangyo sa National Youth Commission o NYC.
Una nang namahayag ang NYC nga dili igo ang panahong gihatag sa Comelec alang sa COC filing tungod sa minus nga turn-out sa mga kandidatong miduso sa ilang COC alang sa SK.
Samtang sundon sa tanang election officers ang resolusyon sa Commission on Elections o Comelec diin naglugway sa dugang usa ka adlaw aron modawat sa sertipiko de kandidatura sa mga kandidato ning adlawa.
Kini bisan nga nagtoo si Comelec regional director Atty Reynato Magbutay nga dili na unta gikinahanglan lugwayan ang COC filing.
Miingon si Magbutay nga anaa sa 60 ngadto 65-mil ka aspiring candidates ang nakaduso sa ilang COC gikan sa 2-mil 022 ka barangay sa rehiyon sulod ning semanaha.
Samtang,kon mapagawas na ang opisyal nga listahan sa kandidato para sa Brgy ug SK election, gilayong mulusad sa forum ug covenant signing ang Comelec officers sa tibook Pilipinas.
Gibutyag ni City Election Officer Atty Ramil Acol nga laraw nilang usahon ang tanan mga kandidato sa covenant signing aron makadaginot sila’g oras.
Pinaagi sa covenant signing, mapaklaro sa matag kandidato nga gidili ang ilang himoong pagpalugwa sa dautang pulong batok sa laing kandidato ug pag-inisyar sa pisikal nga kagubot.
