CAGAYAN DE ORO CITY-Nagtoo si Ozamiz City Police Office Director Supt Jovie Espenido nga gituyo ang pagsunog sa panimalay sa wanted nga si Misamis Occidental board member Ricardo “Ardot” Parojinog.
Si Espenido miingon nga nanimahong gasolina ang palibot sa panimalay ni Ardot hinungdan nga nagtoo sila nga intentional ang pagsunog niini.
Asoy pa niini nga dako ang posibilidad nga nahibal-an sa kanhiay board member nga nagplano sila nga mag-apply sa laing search warrant sa korte human gibulgar sa nadakpan niining driver nga si Glenn Hernando nga daghang mga armas ang anaa sulod sa balay ni Ardot.
Samtang gisalikway ni Espenido ang posibilidad nga nagtago sa teritoryo sa pamilyang Barros si Ardot sa Libona, Bukidnon.
Matud ni Espenido nga dili mabuhi sa probinsiya si Ardot tungod kay dili kini gakaon sa mga pinobre nga pagkaon.
Una nang nagtoo ang Criminal and Investigation Detection Group -10 nga nakasibat si Parojinog sa ilang gihimong operasyon batok sa magtiayong Cherry Barros ug Tarcisio Barros.
