CAGAYAN DE ORO CITY-Paningkamutan sa Department of Labor and Employment o DOLE-10 nga makab-ot ang gitahas kanila sa central office nga i-regular sa trabaho ang 15-mil ka mamumuo sa tibook rehiyon.
Matud ni DOLE Technical Director JV Vasallo nga anaa pa lamang sa 2-mil 119 ka trabahante ang ilang napa-regular sa trabaho.
Gani, ilang gi-paspasan karon ang pagpahigayon sa mga forum aron mahataga’g katumanan ang hagit kanila ni DOLE Sec Silvestre Bello III.
Gipasalig usab ni Vasallo nga madugangan pa ang ihap sa mga kompaniya nga ilang isyuhan sa compliance order for regularization sa tibook rehiyon.
Si Vasallo miingon nga anaa na sa 15 ka kompaniya ang ilang napadal-a’g sulat.
Siya nagbahad nga kun ugaling pabiling magmagahi sa paghunong sa labor-only contracting ang maong mga kompaniya, mag-atubang kini sa dakong problema sa ilang ahensiya.
Samtang dili kontento ang Associated Labor Unions-Trade Union Congress of the Philippines o ALU-TUCP-Northen Mindanao sa unod sa executive order kontra endo nga pirmado ni Pres Rodrigo Duterte atol sa Labor Day.
Matud ni ALU-TUCP Vice Pres Nick Borja nga walay kalainan ang EO ni Pres Duterte sa Department Order 174 nga nahisgot sa labor-only contracting ug sub-contracting.
Hisayran nga bisan ang Kilusang Mayo Uno ang wala usab mahimoot sa gilagdaan nga EO ni Pres Duterte.
Gitin-aw usab ni Borja nga bisan wala sila malipay sa executive order kontra endo nga pirmado ni Duterte atol sa Labor Day.
Miingon si Borja nga mas excited sila sa aksyon nga himoon sa Kongreso sa security of tenure bill.
Si Borja miingon nga nalipay sila sa lakang nga gihimo ni Duterte diin iyang gi-sertipikahan nga urgent ang pagpasar sa sugyot-balaodnon nga security of tenure.
