CAGAYAN DE ORO CITY-Nabati gihapon sa pipila ka residente ang epekto sa pulitika bisan nahuman na ang Barangay ug SK elections sa Misamis Oriental.
Kini human nangayo’g tabang sa Bombo Radyo ang pipila ka mga residente sa Sitio Danao, Barangay Taytay El Salvador Misamis Oriental nga nawad-a’g tubig.
Matud sa complainant nga si Jaime Dagapioso nga walo ka pamilya ang nawad-a’g tubig human sila giputlan sa supporters sa napilding incumbent Punong Barangay nga si Lilibeth Garcia.
Dugang ni Dagapioso nga gilayong giputol ang ilang tubig human masayri nga napildi si Garcia sa iyang kaatbang nga si Engr. Loloy Estrada.
Sa pagkakaron, gapangayo nalang og tubig sa ilang mga silingan ang apektadong pamilya.
