CAGAYAN DE ORO CITY-Gikondinar sa govt prosecutors ang kamatayon sa ilang kauban kinsa nagsilbing chief of prosecutors sa Ozamiz City kagahapong adlawa.
Kini human kumbinsido si Regional State Prosecutor o RSP Merlynn Uy nga planado ang pagpusil kang retired city chief of prosecutors Atty Guillermo Marabe Jr,hingkod ang panuigon,minyo ug nagpuyo sa maong lugar.
Miingon si Uy nga naghimo lamang sa trabaho si Marabe isip defense counsel sa pamilyang Parojinog nunot sa illegal drugs case batok magtiayong Melodina Parojinog ug Gaudencio Malingin.
Si Melodina ang kamanghurang igsoong babaye nila ni late Ozamiz City Mayor Reynaldo ‘Aldong’ Parojinog Sr ug wanted nga si Ozamiz City Councilor Reynaldo ‘Ardot’ Parojinog.
Samtang gitutukan sa kapolisan ang anggulo sa kalambigitan sa gidiling droga,onsehan ug love triangle kon nganong gipusil-patay si Marabe gikan sa pagtambong sa court hearing sa Ozamiz City.
Miingon si Ozamiz City Police Office commander C/Insp Jovie Espenido nga wa nila wad-a ang anggulo nga gipapatay sa druglord nga si Jeden Duhaylungsod si Marabe tungod sa paglaban sa mga Parojinog.
Giimbestigaran usab ni Espenido ang atraso ni Marabe sa mga giingong mga ‘resolution for sale’ sa panahon nga kini chief of prosecutors pa sa Ozamiz City.
Gipangita usab sa kapolisan ang lalaki nga ka-relasyon sa live-in partner nga babaye ni Marabe nga posibleng may kasuko batok kaniya.
