CAGAYAN DE ORO CITY-Gikinahanglan sa katawhan ang padayong implementasyon sa martial law batok sa hadla sa terorismo dinhi sa Mindanao.
Kini ang tubag ni AFP chief of staff Gen Carlito Galvez batok sa mga grupo nga nanawagan nga wad-on na ang martial law tungod sa giingong mga abuso sa tawhanong katungod.
Miingon si Galvez nga pipila lamang ang supak niini apan ang kadaghanan sa taga-Mindanao ang dakong uyon aron pugngan ang laing hugna sa pagpangatake sa mga terorista sa Marawi City sa miaging Mayo 2017.
Samtang gikompirmar ni Joint Task Force Ranao deputy commander Col Romeo Brawner nga anaa sa 42 ka miembro sa teroristang Maute-ISIS ang mi-surrender sa gobierno sa Marawi City,Lanao del Sur.
Kini sukwahi sa gihimong padayong pagpangilad sa terror sub-commander Abu Dar nga nang-recruit sa dugang miembro gamit ang social media.
Miingon si Brawner nga gamay’ng pundok lamang ang gihuptan ni Abu Dar nga walay kapas makalusad sa urban warfare sama sa nahitabo sa Marawi City sa miaging tuig.
Dumduman nga mismo si Pres Rodrigo Duterte ang miawhag sa nabiling Maute-ISIS nga motahan sa gobierno aron sila mahurot ug kamatay.
