CAGAYAN DE ORO CITY-Mag-atubang sa patung-patong nga kasong kriminal ang RTMI bus driver nga nahulog sa pangpang sa Purok 2 Brgy Patpat,Malaybalay City,Bukidnon kagahapon sa hapon.
Kini human nag-resulta sa kamatayon sa tulo ka tawo samtang 28 ang samaron sa maong aksidente.
Miingon si Sr/Insp Julius Saluta,chief investigator sa Malaybalay City Police Office nga giila ang mga namatay nga si Regine Abug,10 anyos,taga-Brgy Maligaya;Jomaica Tacay,14 anyos,taga-Brgy Patpat,pulos taga-Malaybalay City ug Irene Gaa,33 anyos nga taga-Brgy Carmen dinhi sa syudad.
Kabahin usab sa mga samaron si SPO3 Espijon nga nadestino sa Impasug-ong Police Station ingon man ang bus driver ug kuyog nga conductor niini.
Nadala usab sa lain-laing ospital ang mga samaron samtang padayon ang pag-imbestigar sa maong aksidente.
