CAGAYAN DE ORO CITY-Gisuspenso sa LTFRB-10 sulod sa usa ka bulan pipila ka bus units sa Rural Transit Mindanao Incorporated o RTMI nga dunay biyahe gikan Cagayan de Oro padulong sa Valencia City,Bukidnon.
Kini human unang nalambigit sa aksidente ang usa sa RTMI bus diin tulo ka tawo ang patay samtang laing 28 ang samaron sa Brgy Patpat,Malaybalay City,Bukidnon niadtong adlaw’ng Huwebes sa hapon.
Gibutyag ni LTFRB regional director Allan Guro nga gipa-isplikar usab nila ang management sa bus company kon nganong dili kini angay e-suspenso tungod sa hitabo.
Namatay sa maong hitabo sila si Regine Abug, 10;Jomaica Tacay,14 ug pulos taga-Malaybalay City ug Irene Gaa, 33 anyos nga residente sa Brgy. Carmen ning syudad.
Samtang kasuhan gihapon sa kapolisan ang driver nga nagmaneho sa RTMI bus nga gisakayan sa dul-ag 30 ka tawo diin may tulo ka ang namatay dihang nahulog sa pangpang sa Brgy Patpat,Malaybalay City,Bukidnon.
Gibutyag ni Sr/Insp Julius Saluta,chief investigator sa Malaybalay City Police Station nga itugya nila sa piskalya ang mahimong hukom kon angay ba buhian ang RTMI bus driver nga si Benjamin Marinay nga taga- Wao,Lanao del Sur.
Gikompirmar usab ni Saluta nga wala magpasagad ang bus company sa pag-atiman sa mga samarong pasyente nga anaa pa sa lain-laing ospital sa Bukidnon.
