CAGAYAN DE ORO CITY-Nasunog sa dinagkutang kandila ang usa ka andanang balay diha sa Villamar Subd.Brgy Iponan ning syudad kagabii.
Giila ni SFO3 Samson Velarde,commander sa BFP-Carmen Sub-Station ang tag-iya sa balay nga si Elmer Asok nga nagpuyo sa maong lugar.
Subay sa mga silingan,naggamit sa kandila ang dalagita nga nabilin sa balay kay kalit nawala ang kuryente apan nakamugna na hinoon kini’g sunog.
Hinoon,dali nga napalong sa mga tawo ang kalayo ayha nakaabot ang mga bombero gamit ang tubig gikan sa ilang drainage.
Natala sa inisyal nga 50-mil pesos ang structural damage ang maong sunog.Samtang 10-mil ka pesos ang damyos human masunog ang duha ka andanang panimalay diha sa may Zone 8-A Barangay Cugman ning syudad.
Maoy nasunog ang panimalay sa magtiayon nga sila si Armand ug Julie Padregao.
Sumala sa silingan sa nasunogan nga nag-apil og Brigada Eskwela si Julie Padregao ug iyang duha ka mga anak lang ang nabilin sa balay.
Nagtoo ang silingan nga nagdula og kalayo ang mga bata hinungdan sa pag-ulbo sa sunog.
