CAGAYAN DE ORO CITY- Makabalik na sa ilang mga pinuy-anan ang dul-ag 200 ka residente nga boluntaryong namiya tungod sa engkuwentro sa militar ug 40 ka miembro sa rebeldeng New People’s Army sa Sitio Sinkamansi,Brgy Banglay,Lagonglong ning lalawigan.
Gihimo ni 58th IB commander Lt Col Roy Anthony Derino ang kasiguruhan nunot sa pagka-abog na sa mga rebelde sa lugar kagahapong adlawa.
Miingon si Derino nga nabawi usab nila ang dakong kampo sa mga rebelde ingon man ang daghang kagamitan sa pang-gubat.
Gikompirmar niini nga samaran ang usa sa ilang sundalo samtang duha ka NPA rebels ang patay sukad ang engkuwentro sa Domingo sa buntag.
Samtang apektado ang turismo sa natigayong engkuwentro tali sa militar ug rebeldeng New People’s Army o NPA sa lungsod sa Lagonglong,Misamis Oriental.
Nabalaka si Gov Bambi Emano nga mohuyang na usab ang turismo tungod sa sinukliay sa mga sa duha ka pundok diin duha ka rebelde ang patay ug laing sundalo ang samaron sa miaging adlaw.
Miingon si Emano nga unta makauli na si CPP founder Jose Maria Sison aron mokalma na ang mga sakop niini nga kanunay gukdon usab sa tropa sa gobierno
