CAGAYAN DE ORO CITY-Nakompiskar sa dul-ag 50 milyones pesos nga kantidad sa pirated DVDs nga naka-display palibot sa Cogon Public Market ning syudad kagahapong adlawa.
Kini human mihimo’g pagpang-ronda ang Optical Media Board o OMB sa batok sa maong mga kontrabando ning syudad.
Gibutyag ni Atty. Cyrus Paul Valenzuela, chief sa Legal Division sa OMB-Manila nga 350 ka sako sa pirated DVDs ang nakompiskar gikan sa upat ka managlahing tindahan sa syudad atol sa anti-piracy operations kagahapong adlawa.
Una niini, lakip sa gironda sa kapolisan ang mga merkado,Agora, Cogon,Carmen ug lakip na ang Divisoria Area nga sagad baligyaan sa pirated DVDs.
Dad-on sa OMB-central office ang sinakong pirated DVDs alang sa tukmang aksyon niini.
